مرت سنة كاملة ونسيت خالد او صرت اتناساه ..
عرفت من أماني انه خطب وزواجه بالصيف بعد اسبوعين ..
ضاقت الدنيا فيني يوم دريت، حسيت دمي يغلي من الغيرة ..
الحين بيقول لها مثل مايقول لي؟ بيدلعها وبيمزح معها مثل ماكان يسوي لي؟
الغيرة صعبه.. والاصعب انك تغار على شخص مو من حقك تغار عليه ..
أماني حاولت تعرف وش صار بيينا انا وخالد بس ماحكيت لها شيء ابداً . .
وأماني تزوجت زواج عائلي وماشيه فحياتها ..
ورجعت حياتي الطبيعية ، من دون ما ارتبط باي شخص..
...
..
.
كنت قاعده اتجهز عشان اروح للمطار.. زواج اياد بكرا ..
لبست وودعت اهلي ورحت للمطار..
ركبت الطياره وفتحت ليي كتاب والسماعة بأذني..
قعدت افكر بالاحداث الي صارت بفترة بسيطة وغيرت حياتي..
حمد كمل حياته مع زوجته وبنته ورضى بالامر الواقع ..
عرفت ان مو زوجته الي محاكيه خالد وان كل الي صار خطة من حمد ..
حمد اعتذر لي وسامحته.. وقال لو تبين اقول لخالد كل شيء وترجعون لبعض بس انا رفضت ..
رفضت لأن خالد خطب ولا ابي اوقف بحياته..
حمد كمل حياته وانا وقفت بالنص. خربّ لي حياتي وكمل.. الله يسامحه بس..
وصلت للاردن بس هالمره من دون مايكون معاي صدفة تغير حياتي..
اول ماوصلت اخذت لي تاكسي ورحت لبيت ام اياد ..
قعدت معاهم شوي ورحت انام جتني مايا بالغرفه وانا منسدحه ..
مايا :" علووي"
"مايا وتبن اسمي لاتخربينه علييا علييا" ضحكت عليّ.
مايا:"شفيك طيب"
"مافيني شيء بس تعبانه من المطار"
مايا:" مو علي هالحكي. فيكي شيء واضح اول مره تجين وانتي مو مبسوطه"
سكتت وتنهدت.
"مايا صدق مافيني شيء " غمضت عيوني ما ابيها تشوفيني وانا اصيح..
مايا:"براحتك. يلا تصبحين على خير" وباستني مع رأسي وطلعت ..
قمت اشوف نفسي بالمرايا.. كل شيء فيني متغير..
كله منك ..
قررت اتغير واصير مثل اول وازين ..
تغيرت كثير، صحتي اهملتها وحياتي بكبرها اهملته ..
شغلي.. الي اغلى شيء بحياتي صرت اسويه وانا مالي نفس.. عقب ماكنت استمتع بكل لحظه الحين مالي نفس
الله يالدنيا ..
تغيرت للأسوء وكله منك ..
غسلت وجهي وطلعت للصاله .. كانت ام اياد بس قاعده ومايا بالمطبخ..
رحت جنب ام اياد وحطيت كتفي عليها..
"اشتقت لك:)"
ام اياد:" والله وانا اكثر"
"اشتقت لحياتي اول.. اشتقت لمحمد اشتقت صدق"
ام اياد :" الله يغفر له ويرحمه" ومسكت يدي.
تنهدت وقلت " آمين".
سكتت شوي ..
" أحس حياتي كانت احسن وقت ماكان محمد موجود.. فقدت اخو وصديق" دمعت عيوني.
ام اياد:"كلنا فقدناه.. تعالي هنا" وأشرت على رجلها..
انسدحت على رجلها وانا ضايق صدري.. ونمت بدون لا أحس..
قمت الصباح وانا بالغرفه . طلعت لهم كانوا كلهم صاحين..
"ياصباح الخير ياصباح عرس احلى اخو بهالدنياا"
ضحكو كلهم..
اياد::"صبااح النور"
ام اياد :" الروقااان واصل الف"
"ايي نمت نومه حلوه"
مايا:" تعالي افطري مافيه وقت"
قعدت معاهم والباب انطق..
اياد:" وهذا خالد جاء"
غصيت بلقمتي من الصدمه.
ام اياد عطتني مويا.
ام اياد:"بسم الله عليك"
"وش قلت؟ مين الي عند الباب؟"
اياد:"خالد خال ديما"
"وش جابه؟ اقصد انت عازمه ولا وشو" وناظرتني ام اياد نظره..
اياد:"اي شو فيكي اختبصتي هيك فجأة" وراح بيفتح الباب.
ام اياد:" انا بدي اطلع هلاّ لمشوار ضروري،، عليا بدك تجي معي؟"
مايا:" ما افطرت عليا"
"لا عادي بطلع،، بقوم البس " وقمت رحت لغرفتي.
ناظرت نفسي بالمرايا واخذت نفس طويل... مو مستعده ابداً اشوف خالد..
لبست وطلعت سمعت صوته وهو يضحك ..
خنقتني العبره.. طلعنا برا
كنا نمشي بالشارع.
"اي وين نروح الحين"
ام اياد:" ولا شيء"
"شلون" مسكت يدي وقعدنا بكرسي.
ام اياد:" عليا انا بفهم عليك، من وانتي صغيره وانا بعرفك.. شو صاير بينك وبينه؟ مزعل لك قلبك؟"
"ماكتب ربي نصير مع بعض"
ام اياد :" ليه شو صار"
"مافيني حيل احكي، بس مايستاهل"
ام اياد:" دامه مابيستاهلك لاتزعلي منشانه.. انبسطي
مابعمرك حكيتي لي شيء.. بس بعرفك انتي قوية
وقدرتي تمرين بكل هذي الظروف لحالك
لاتغيب ابتسامتك"
ابتسمت لها..
"خيره" ..
ام اياد:" ايوه هذي عليا"
"احكي لي وشلون كنا انا ومحمد.. ابي اتذكر هذي الايام وانبسط"
قعدت تحكي لي ..
بعدها رجعنا للبيت وماكان فيه خالد ..
بس ادري اني بشوفه بالليل..
جاء الليل ولبسنا كلنا، كان فستاني اسود طويل..
حطيب ميك اب وبعدها حطيت لمايا.. ورحنا للزواج،
اول مادخلت المكان.. طاحت عيني بعين خالد ونزل عيونه
كان الزواج برا والجو كان هواء شوي..
كملت مشي وسلمت وقاعده اسولف واسوي نفسي انه ماهمني..
مر الوقت وانزفو لبعض وجاء وقت العشاء..
ما اشتهيت اكل شيء، رحت قعدت لحالي برا والناس جوا يتعشون ..
جاء خالد وقعد ..
ناظرته وماقلت شيء،
خالد:" اهلاً عليا"
"هلا"
سكتت ماقال شيء.
جيت وقفت عشان امشي.
خالد:" عليا آسف" ناظرته بنظره استحقار..
"اسف؟ الاسف بيغيير شيء؟ اللاسف بيخليني مبسوطه وبرجع بحياتي طبيعيه؟
خالد لا تتأسف وانت ماعطيتني فرصه اني احاكيك ولا اشرح لك.. تجاهلتني بكل سهوله
تجاهلت ولا وثقت فيني.. للأسف ان الاسف مابيغير شيء بس حكي"..
سكتت بعدين قلت ..
"اول مره بحياتي امشي ورا قلبي وندمت ياخالد ندم .. ندمت لدرجة انتي تمنيت اني مت بدال محمد ولا عرفتك.. تمنيت اني تجاهلتك تمنيت ان الصدفه ماصارت .. الصدفه هذي اخذت من عمري عمر" كانت عيوني متغورقة بالدموع.
خالد:" علي..." قاطعته.
"لوسمحت خالد. انا ما ابي اسمع حكيك الي ماله فايده"
خالد:" طيب .. الله يوفقك بحياتك ويعوضك"
ومشى ..
ماتحسفت ولا على اي كلمه طلعت مني. بالعكس كان ودي زياده ابرّد حرتي..
مسحت دموعي ورحت عندهم ..
...
..
.
بعد مارجعت للرياض.. قعدت مع اهلي،
ماما:" كيف العرس عسى انبسطتي"
"اي يارب لك الحمد:) والله ام اياد تقول حسافتهم ليتهم جايين"
ماما:" تدرين ابوك مايركب الطياره ولا اقدر اخليه"
"اي قلت لها" بعدين سكتنا ومسكت جوالي.
ماما:"عليا"
"سمي"
ماما:" تعرفين ام صالح جيراننا؟"
"اي اعرفها الي جت الاسبوع الي راح؟"
ماما:"ايي هذي هي"
"شفيها"
ماما:" مره تمدحك وخطبتك لصالح ولدها"
"وش قلتي لها"
ماما:" قلت بنشوف ونرد لك"
التفت على ابوي.
"وش رأيك"
بابا:" والله الولد كويس وحليل وماقد سمعت عليه شيء مو زين"
"انا بستخير وارد لكم"
استخرت وحسيت اني مرتاحه .. بعد كم يوم قلت لامي اني موافقه والشوفه بعد اسبوع ..
مرت الايام، وبيوم الشوفة كان زواج خالد .. يالصدفة ..
حطت لي نجود ميك اب ولبست فستان ناعم طويل..
ناداني ابوي ودخلت،
نزل عيونه اول ماشافني، كملت مشي وقعد جنب ابوي..
رفع رأسه صالح وناظرني.. كان مبتسم،
ابوي:"انا بستأذنكم شوي واجي" وطلع ..
صالح:"شخبارك عليا؟"
"الحمدلله وانت بشرني؟"
صالح:" الحمدلله"وكان مبستم.
صالح:"طالعه تهبلين"
ضحكت له: "شكراً"
تذكرت خالد وقت ماكان يمدحني واضحك عليه..
اكيد ان الحين يمدحها وهي تنزف له..
اكيد يشوف عيونها وبيتغزل بعيونها ..
صالح:" علييا"
"هلا، اسفه شوي سرحت"
صالح:"لا عادي" وضحك.
ابتسمت بوجهه.
قعد يسولف لي عن حياته وشغله .. وبعده جاء ابوي وطلعت،
قعدت مع اهلي شوي وبعدها رحت لغرفتي..
ارتحت لصالح مره .. وملكتنا بعد كم شهر ..
وماوقفت حياتي مثل ماكنت افكر..
انا خسرت خالد صح، ولا راح احب شخص مثل ماحبيته ..
وهذا درس لي ان الحياة ماتوقف على بني آدم..
إنتهت ..
ليست هناك تعليقات:
إرسال تعليق