قعدت شويه ونمت..
مع الايام بدت علاقتي بخالد تزيد، صار صديق وحبيب بنفس الوقت..
ماكنت اقول له وش احس اتجاهه ابداً، اخاف اني اقول هالشيء..
بعد اسبوع تقريباً..
كالعاد صحيت للداوام وركبت السياره، ويحاكيني خالد.
خالد:"متأخره اليوم بعد؟؟"
" لا بدري مره"
خالد:"ماعندك حل وسط"
"بالضبط"
خالد:"بكرا بسافر"
"مشاء الله، شغل او اجازه"
خالد:"لا اجازه تعبت من الشغل قلت اوسع صدري شوي"
"اي صح ترتاح"
خالد:"اي وهالمره مو مع اهلي مع اخوياي"
"زين توسع صدرك"
خالد:"وانتي ماراح تأخذين اجازه العيد؟"
"بكرا واول يومين العيد اجازه لكل الموظفين بعدين يبدأ تكليف العيد"
خالد:"خوذي وريحي نفسك"
"لا عادي"
خالد:" طيب انا بروح اقضي الاغراض الي ناقصه تبين شيء؟"
"سلامتك بحفظ الله"
كان عيد الأضحى بعد يومين..
كملت شغلي الى ماخلص الدوام وطلعت للبيت..
قعدت لحالي بالبيت.. ماما طالعه مع خالتي وابوي مع عمي،
دق علي رقم غريب ورديت،
....:"عليا لاتقفلين بس بحكي معاك" عرفته من صوته.
"وانا ما ابي احكي معاك، ياخي مسويه لك بلوك من كم رقم وللحين تتصل؟"
حمد:"عليا احلف لك برأس بنتي، اني احبك وابيك"
"انت تستهبل؟ عندك بنت وتدور احد ثاني؟"
حمد:"مادورت، لقيتك صدفه وبقيتي فيني"
"واللي يعافيك انا عندي حياتي، لعد تحاكيني ولا صدق هالمره برفع عليك قضيه!"
حمد:" حياتك مع الولد الي شفته بالمستشفى؟" عرفت انه يقصد خالد.
"معه او مع غيره، مايخصك.. واضح الحكي مايفيد معاك" وقفلت بوجهه.
ومتزوج بعد..
قعدت اكتب وسويت لي قهوه ومر الوقت، وبعدها نمت..
صحيت الصباح على الساعه 9،
لقيت خالد محاكيني واتس.
خالد:"صباح الااجازه"
"صباح الخيرر"
خالد:"ماتوقعتك تصحين بدري"
"نايمه بدري ماطولت"
خالد:" وش سويتي امس بدوني"
"ولا شيء قعدت بالبيت اكتب واخربط"
خالد:"وريني وش كتبتي"
"بالجنة ان شاء الله:)"
خالد:"مره بس؟؟ تردين لي طلب؟"
"ما ارد لك اي طلب بس إلا هالطلب، ما احب اخلي احد يشوف"
خالد:"على رااحتك"
وقعدنا نسولف.. وجاء المغرب وكنت بطلع مع البنات واستناهم يجون وخالد بالمطار.
دق علي،،
خالد:" بركب الطياره بعد شوي"
"توصل بالسلامه وانتبه لنفسك"
خالد:" بفقدك"
"هاو شكلك بتتزوج هناك"
خالد:"يمكن ماتدرين"
"اي اجل الله يوفقك"
خالد:"صدق صدق عليا بفقد حسّك.. بالصبح وقبل ما انام احس تعودت"
حسيت عظامي ترجف من كلامه.
"وانا بفقدك" ما ادري كيف طلعت مني.
خالد:"وش قلتييي؟؟؟"
ضحكت.
خالد:" الحياء مقطعك واضح"
سكتت.
خالد:"يلا العيال ينادونني، انتبهي لنفسك واول ما اوصل بحاكيك"
"زين" وقفلت منه.
للآن مابيني انا وخالد شيء حقيقي احس.. للآن وما قال لي عن مشاعره ..
ولا انا، يمكن مافيه مشاعر يحس فيها إتجاهي ..
بس أوهم نفسي..
بس نهتم لبعض.. ونفهم بعض.. خالد لقيت فيه كل الصفات الي احبها.
طلعت مع البنات ورجعت للبيت ونمت،
بعد ماصحيت لقيت واتس من خالد..
خالد:"صباح الخير ياوجه الخير..
وصلت الحمدلله."
"الحمدلله على السلاامة" رديت عليه وقفلت جوالي.
ليلة العيد، طلعت مع امي اجيب الاغراض
وحوسه ونتجهز .. حرفياً جاني صداع ومت تعب.
نمت على المغرب وصحيت على الفجر..
البيت هدوء.. تسبحت وقعدت سويت لي قهوة.
كان مايمليه الا صراخي انا ومحمد ..
جاء العيد وانت تحت ترابك ياحبيبي..
بعد نص ساعه صحو امي وابوي عشان يتجهزون للصلاة..
تجهزت ولبست وطلعنا نصلي وبعدها رحنا لعماني.. تعايدنا كعادتنا،
وانا قاعده اتقهوا جتني رسالة من خالد..
كان مرسل لي فيديو شعر، لبست سماعتي..
كل عام وانت بخير..
يا أغلا البشر يا سيد الساده
هذا وسامحنا على التقصير
والله يزود في عمرك أعياده
وانا اللي أحبك محبة غير
من قلبي ومن فوده أفواده
كل عام وانت بخير وانا بخير
كل عام وانا أحبك زياده
وكل عام وأنا أكافح التغيير
وكل عام ولا انت بعلى العاده
وكل عام وانا أغيير التفكير
واحبك بإصرار واراده
وكل عام ودموعي عليك تحير
وهذي السنة بالذات هداده
-سعد علوش.
بعدها ارسل..
خالد:" كل عام وانتي بخير وصحة وسلاامة"
ابتسامتي واصله لأذني من كثر ما اعجبني الحكي..
"وانت بخير وصحة وسلاامة" مابغيت اكتب حكي زياده ..
خالد:" عليا بطلع مع العيال ولا راح اكون حول الجوال"
"اي عادي خذ راحتك."
ورجعت للبيت كان خالد مرسل لي لاصرتي فاضيه حاكيني..
دقيت عليه.. ورد،
خالد:"هلا والله هلا بهالصوت"
"هلا فييك" وضحكت.
خالد:"شخبارك وشخبار الرياض بدوني؟؟"
"كلنا بخير ومنوره الريااض"
خالد:"عارف انه مو من قلبك"
"ياحبيبي الي يففهم"
خالد:"وش قلتي؟؟؟"
" بالغلط"
خالد:"عقبال ماتقولينها وانتي مو غلطانه"
سكتت.
خالد:"قريت كلام اليوم"
"وشو"
خالد:"خليني اكمل حكيي لاتقاطعيني"
"اوكي كمل:)"
خالد:" الزبده ان قريت كلام،، ان اذ كنت تحبها اعترف لها ومن هالكلام تأييدين هالشيء؟"
سكتت واحس عظامي ترجف.
خالد:"وين اختفيتي؟"
"معاك معاك"
خالد:" اي وش رأيك"
"مدري خالد يعني انت تحب وحده الحين وتبي تعترف لها؟"
خالد:" اي بس ما ادري كيف"
"الحياة مره قولها متى ماحسيت ان الوقت مناسب" كنت اتقطع من جوا قلبي وانا اقول هالحكي..
خالد:"طيب قاعد احاكيها الحين وش اقول لها؟"
"خالد وش فيك؟؟ قل لها عن مشاعرك"
خالد:" عليا"
"سمي"
خالد:" انتي الي قلبي يبيها.. وانتي الي جيتيني صدفة وبقيتي فيني عمر..
مو قادر انساك، اتذكر وجهك وصوتك كل شيء.. انا احبك عليا" ..
انربط لساني حرفياً.. ماقدرت اقوله شيء
خالد:" عليا"
"هلا خالد"
خالد:"وقف قلبك؟؟" وضحك.
من سمعت ضحكته ضحكت معه لاشعوري..
"لا خالد منصدمه، الحكي يصدم"
خالد:"لا حول ولا قوة الا بالله.. اول مره اشوف بنت تنصدم من هالكلام"
"نعم؟؟ لايكون قايل لعشرة قبلي"
خالد:"انتي الاولى والاخيره"
"مايندرى عنك،، عسى يارب"
مارد.
حسيت ان لازم اقول شيء..
"خالد، احمد الله انك بحياتي صدق"
خالد:"وانا احمده الف ان شفتك، حبيبتي العيال ينادونني ساعه"
"اي روح لهم، بحفظ الله".
13 سبتمبر.
" كل محاولات الهروب منك باتت بالفشل..
وكأنك أصبحت نصفي الآخر..
إنه من الصعب أن افصح عن مشاعري نحوك.. أشعر وكأن شيء يمسكنني
لكي لا أقول لك اني احبك.. واني احببت عيوبك قبل حُسنك ..
أحببت فيك مالم تحبه أنت في نفسك..
**
يتبع..
ليست هناك تعليقات:
إرسال تعليق